機場交通

曼谷落機點去酒店？

機場快線、50銖服務費的士、巴士、酒店接駁車……相關資料大家都好易搵到，所以我只會講小小大家應該注意嘅貼士。

機場快線真係好方便快捷，而且價錢相宜。但要注意如果你係MAKASAN轉車的話，兩個站並唔係香港咁兩個站有connection，大家要經路面由一邊站行去另一邊，即係好似東鐵線旺角東站行去地鐵太子站咁。但係大家都知道，泰國其中一嘢出名嘅就係“路爛“，尤其拉住個喼咁行，簡直同隻手做另類massage 咁，所以除非自己一個人又早機，如果唔係我都未必選擇！所以如果真係想坐airport rail的話，不妨去Praya thai，o個度係有skywalk連接的。

泰國bts官網: http://www.bts.co.th/index_CoverPage.html

機場的士站自從多咗counter 幫人用泰文寫酒店俾司機之後真係好咗好多，但由於好多司機都唔太識路，所以我通常都會自己上酒店網頁download 個泰文地圖，以備不時之需，同埋張地圖其實喺未來幾日都好有用。

由於中港女成日都自己一條友仲要收工夜機飛，如果到埗係半夜，通常都費事煩，會喺出發前喺香港book定的士，當然價錢會貴少少啦，一口價800銖機場去任何一間曼谷市內酒店，800銖係全包價，即係高速路費、塞車……同埋最重要係負責人係香港人，你只需要喺香港用電郵就可以預先攪掂晒，到埗又有人舉名牌等你，直奔酒店check in。

七人的網址：http://www.7staxi.com/

兌換參考

好多人都會問"邊度兌換泰銖？"，"邊間兌率高？"，"兌幾多？"首先講下兌換地點先：

穩陣型：香港兌換
唔好笑喎，中港女身邊真係好多人會出發前喺香港兌定泰銖先，當中以一家大細出發遊泰尤甚。如果真係想喺出發前兌定啲泰銖旁身，可以到好出名嘅"百年"，我諗會外遊嘅朋友一啲都唔會陌生，皆因不論泰銖、日圓…外幣佢都非常齊備，而且兌率較高。有興趣嘅朋友唔好咁懶，不妨上網search 下就有資料。

就手型：泰國機場
落機到埗之後，無論邊個機場、未過海關、過完海關、出埋閘，找換店直情多過便利店，梗有一間喺左近。當然方便就係要付出代價，兌率一般較低！

普遍型：林珍香
位於唐人街嘅林珍香同四面佛旁嘅林珍香都有兌換服務，就算無幫襯齋兌錢都無任歡迎，兌率亦都相當靚仔。

精打細算型：Superrich
任何有上網爬過下文嘅都應該知，兌率至靚都莫過於佢，而家Superrich仲有埋App，大家可以隨時隨地用電話上網睇兌率，不過提醒總店同silom係兌率較高，其他superrich counter會低少少，而且兌換時需要passport， 同埋佢係營業時間係跟office hour。

中港女每次都會留返啲泰銖等下次到埗用，如果一係仙都唔仙就會落機喺機場換500-600港幣，主要係用黎搭車去酒店、買電話咭、食碗魚蛋粉咁。跟住會因應情況決定去林珍香定superrich，如果開舖時間許可，兼且預計喪買放血，就會去superrich換定大部份洗費，但如果星期六日到埗等唔切，就會去林珍香換一半，用到咁上下再換。

當然，喺曼谷街頭大把找換店，但兌率就自己睇啦！