十級好用痱茲膏

中港女好少生痱茲，但係一出o既話就一發不可收拾，好多時都係同時間三粒、四粒一齊出，o個時簡直求生不得咁o既衰樣，而呢隻痱茲膏就係中港女有口難言，痛苦難耐時向一個泰國朋友求救佢介紹。

佢細細枝喞出黎係透明好"杰"膏狀，其實搽完o係痱茲度有野"漿"住感覺麻麻地，通常中港女搽完就唔飲野，等佢個零鐘左右又洗左佢，但只要係搽到兩次左右，粒痱玆就會開始謝皮，唔會再痛。而呢隻痱茲膏經中港女身邊不止十位朋友親身試過，一致好評，從來未試過有人話無效，所以如果你成日會生痱茲o既，不妨買定一兩枝放o係屋企呀。承惠42銖。

五蜈蚣標止咳丸

大家見到呢個包裝係咪覺得有d嚇人呢?

話說呢隻藥係我家老母同一個泰國朋友傾開我又飛o既時候，人地見佢有幾聲咳叫佢買黎試下，之後老媽子o係我飛左時o係電話入面完全九唔搭八形容俾我聽就係：藍藍地白白地色，有個人頭，有兩隻蠍子。無錯，大家聽清楚係蠍子!!!!中港女去到藥房又真係照樣形容俾人聽，誤打誤撞又俾我買o岩左喎。

好，講返呢隻藥，一包入面我估有廿零粒，每次食2-4粒，承惠15銖，即係港幣唔駛4蚊雞。有無用?哈，以中港女親身試過，首先，佢中藥味好重下，根據個指示話要含住o係口等佢慢慢溶，中港女第一次試時真係頂唔順佢陣味，就用水吞服4粒，止到咳....兩個鐘左右，之但係好快又會咳返。但係有次中港女睇緊戲咳到扒街o個陣，由於身上只有咳丸無野飲o係身，為免影響其他睇戲人仕就硬啪左幾粒真係含住等佢慢慢溶，效果係出奇地好，成場戲直到成晚食埋消夜都無再咳過一聲。當然，以中港女o既習慣通常都會買一堆返黎派俾朋友仔試下，收返黎o既結果大致好評，仲久唔久有朋友叫我幫手入下貨要黎看門口。

呢隻藥以我所知香港都有幾多地方有得賣架，大家不妨上裝search下，我上網搵藥成份時睇到香港大約8蚊包，有人亦都話萬寧都有得賣。當然，藥物始終都係食落肚，大家請自己睇清楚成份會唔會有自己敏感成份，食左有咩事就唔好搵我呀。