大愛o既silom, sathorn區

大部香港人都鍾意Siam, Chit Lom, Sukhumvit, Saphan Takin等等區，因為近shopping mall、夜市咁，但係中港女對Sala Daeng, Silom呢區簡直係有偏愛。

首先講下BTS/ MRT附近先，首先有Silom Complex，商場入面除左Naraya之外應該有齊各位香港人要行要買o既野，香港排到死o既韓國牌子The Saem，另外Boots、Jaspal、Central百貨公司都盡在其中，basement就有各款F&B舖頭同Tops Supermarket。除左basement有食肆之外，商場其他樓層仲有好多唔同食肆架，好似有成行成市o既MK邊爐舖，FUJI日本茶.....仲有位於4樓好好味o既banana leaf泰國菜。商場offical site: http://silomcomplex.net/

講完商場，又講返出面街喇，沿BTS天橋兩邊都係街邊檔，或者食野o既舖頭仔，日頭時間以食野醫肚為主，但每日一到黃昏時間就開始變天，因為呢度夜晚就係Patpong夜市，街兩邊都係好似香港女人街o既街檔，各式各樣泰國特產：香薰、番梘、手工藝品、老翻應有盡有，除此之前，呢度更加係酒吧林立，而且更有sexy show、pub、紅燈區、同志等集中地，沿途會不停有人拎住紙仔撩你睇sexy show，即係睇男人打鼓、女人開汽水樽，路邊有d pub就係有火辣辣dancer跳鋼管舞，仲有好多男男女女坐晒o係度叫你message o既按摩舖，如果低胸按摩女郎唔係你杯茶?唔緊要，大馬路Oriental Princess樓上仲有間Body Tune，簡單黎講，呢區正正邪邪任君選擇。可能香港人會覺得呢度比較雜，但坦白講，就算成街都有人sell各式各樣服務，但從來都唔會拉手拉腳，但必須一提就係人多始終要小心自己財物啦。

雖然呢區係中港女大愛，但係呢頭d酒店部份係時鐘酒店，一係就細到入房要上床，最正o既Dusit Thani就成千蚊晚，所以，中港女揀酒店時往往都會先睇左呢區附近o既 South Sathon有無咩酒店o岩價位，之但係行出去BTS/ MRT就要20分鐘左右，而且South Sathon更係領事館同商業區，周圍會比較靜，但中港女就鍾意夜晚搭BTS/ MRT返酒店時，o係街邊食埋宵夜，再買埋宵宵夜返酒店夜晚慢慢嘆。